Þriðjudagskeppnir
/ september 10, 2013
Til stendur að halda þriðjudagskeppnunum áfram meðan veður leyfir og bátar eru á floti. Reyndar lofar spáin ekki góðu þennan þriðjudaginn svo í staðinn væri hægt að sötra rjúkandi kaffi (eða öl) og horfa á beina útsendingu frá Americas Cup, keppni 5 og 6.
Keppnirnar hafa hingað til verið mjög spennandi og ekki mun sigur Bandaríkjamanna í síðustu keppni draga þar úr. Útsendingin hefst kl. 20:00 og fyrri umferð kl. 20:10. Til uppryfjunar. Nú og svo má líka fylgjast með boltanum 😉
Nú stendur yfir elsta og dýrasta siglingakeppni heims, Americas Cup. Keppnin er rúmlega 160 ára gömul. Oft hefur þessi keppni gefið tækifæri til tækninýjunga og þessi keppni er sönnun þess. Þessi risavöxnu koltrefjaskrímsli geta nánast flogið. 40 metra hátt stórseglið er í raun ekki segl, heldur eins og flugvélavængur og kemur bátunum á yfir 40 hnúta hraða. Spurning hvort orðið bátur sé réttnefni á þessi fyrirbæri.
Keppnin er þannig uppbyggð að haldin er áskorendakeppni og sigurvegari hennar fær að kljást við bikarhafann, lið Bandaríkjanna. Lið Nýjasjálands sigraði árskorendakeppnina örugglega, það var í raun engin keppni þar sem hin liðin stóðu þeim langt að baki.
Það er í höndum bikarhafans að setja reglur næsta móts og reglur um hvernig báta má smíða. Drjúgur hluti tímans fer í argaþras lögfræðinga. Í þetta sinn tókst Nýsjálenska liðinu að koma auga á glufu sem gerði þeim kleift að láta bátinn „fljúga“ á væng. Þras og meira þras og þetta þýddi að bandaríska liðið þurfti að breyta sínum bát svo hann gæti líka flogið, annars hefðu þeir aldrei átt sjens.
En eitthvað hefur bandaríska liðinu þótt á brattann að sækja og upp komst að liðsmenn höfðu komið blýi fyrir í bátum sínum í undankeppnum. Líklega til að þyngja þá fyrir vigtina og svo henda því úr og vera þá á mun léttari bátum. Þetta er að sjálfsöðgu ekki eins og heiðursmenn vilja keppa. Betra er að tapa með sæmd en sigra með svindli … ekki satt?
Vegna þessa svindls hefur alþjóðleg kærunefnd úrskurðað að tvö fyrstu stigin sem bandaríska liðið vinnur sér inn verða tekin af því, þ.e. bandaríska liðið þarf að vinna 11 keppnir til að sigra en Nýsjálenska 9 keppnir. Þegar þetta er skrifað hefur bandaríska liðið unnið eina keppni og það Nýsjálenska þrjár. Staðan er því 0–3. Trúlega hefur þó þessi sigur bandaríska liðsins blásið þeim von í brjóst og hjálpað sjálfstraustinu. Keppnin hefur verið jöfn og spennandi eins og tvíliðakeppni á að vera og oft reynt á stjórnborðsréttinn. Nýsjálendingar virðast hafa samhæfðari áhöfn og vendingar þeirra eru mun betri. Vendingar á þessum bátum kosta mjög mikið því báturinn nánast stoppar og tíma tekur að koma honum á skrið aftur.
