Eins og fram hefur komið hérna í skilaboðaskjóðunni verður Þytur með námskeið næsta þriðjudag í nýju kappsiglingareglunum frá ISAF sem tóku gildi í fyrra og munu gilda til ársins 2012. Nánari upplýsingar um námskeiðið er að finna á vef Þyts. Námskeiðið er haldið í tilefni af því að SÍL er nýbúið að gefa út íslenska þýðingu á reglunum sem hægt er að sækja hér. Eins hefur Viðauki M um kærunefndir verið þýddur.

Það er því ágætis ástæða til að hressa aðeins upp á reglufærnina. Til dæmis er hægt að byrja á léttum spurningaleik með því að smella á myndina hérna fyrir neðan og horfast í augu við ómælisdjúp eigin vanþekkingar.

Engin ástæða til að glutra niður hnútakunnáttunni þegar maður hangir inni og hlustar á tónlist vegna þess að búið er að innkalla Toyotuna.

Í Morgunblaðinu á mánudaginn birtist langt og ítarlegt viðtal við Kristján Sigurgeirsson eftir Rúnar Pálmason þar sem fjallað er um aðstöðumál Brokeyjar, skipulagstillöguna sem nú liggur fyrir og samvinnu við Kayakklúbbinn á Geldinganesi næsta sumar.

Smellið á myndina til að skoða viðtalið.

Franski siglingakappinn Franck Cammas sigldi ásamt liði sínu á 105 feta þríbytnunni Groupama 3 fyrir Agulhashöfða og inn á Indlandshaf rétt fyrir sex í morgun eftir fjórtán daga og fimmtán klukkustunda siglingu. Hann er enn nokkrum tímum á eftir viðmiðunartíma Bruno Peyron sem er núverandi handhafi Jules Verne-verðlaunanna. Hann fór hringinn 2004-2005 á 50d 16t 20m 4s á tvíbytnunni Orange II. Cammas er búinn með tæpan þriðjung af leiðinni og þarf að herða sig ef hann ætlar að ná betri tíma en Peyron.

Það blés hressilega köldu á sunnudaginn og upplagt veður til ævintýra á sjó. Tveir þrautseigustu kænusiglarar Brokeyjar, Áki og Úlfur, lögðu í hann með laser og topaz á óldbojshittingnum. Áki fékk tækifæri til að álagsprófa veltibúnaðinn á lasernum og Úlfur árekstrarprófaði tópasinn á steininum við endann á eystri garðinum við ylströndina. Ferðin var svo mikil að hann endasentist í fallegum boga beint út í sjó. Hvorki urðu skemmdir á mönnum né búnaði (umfram það sem þegar var orðið).

Hægt er að skoða fleiri myndir í myndasafni kænudeildar hérna til vinstri.

Siglingaþing fór fram á laugardaginn með um þrjátíu fulltrúum frá aðildarfélögum Siglingasambands Íslands. Fundurinn fór átakalaust fram og lítið breytt stjórn var kjörin með lófataki. Úlfur Hróbjartsson var áfram kjörinn formaður. Ársskýrsla og fjárhagsáætlun SÍL var lögð fram til samþykktar og skipað í nefndir.

Ef smellt er á "nánar" má sjá örlitla umfjöllun um umræður á þinginu og mótaskrána 2010.

Keppni dagsins gerði út um það hver hreppti Ameríkubikarinn. Líkt og í keppninni á föstudag reyndist þríbytnan USA-17 ná mun betri siglingu í öllum vindi en tvíbytnan Alinghi 5 í þríhyrningsbraut. Báðar fjölbytnurnar eru níutíu fet, en USA-17 notast við stífan væng fyrir stórsegl sem reyndist þeim betur í beitivindi. Bandaríska liðið var fyrra yfir startlínuna og jók forskotið jafnt og þétt alla keppnina. Niðurstaðan var því sú að USA-17 sigraði með fimm mínútna mun.

Eftir allan lögfræðifarsann kringum þekktustu siglingakeppni heims fór langþráð fyrsta keppnin í Ameríkubikarnum loksins fram í Valensíu í gær. Ekki að það hafi gengið þrautalaust að koma þessum risafjölbytnum af stað; fyrsta keppnisdaginn var of lítill vindur og annan keppnisdaginn var of mikil alda. Í gær voru loks hentugar aðstæður til þess að koltrefjarisarnir gætu siglt án stórkostlegrar hættu á skemmdum. Eftir smáklúður í startinu náði þríbytnan USA-17 mun betri siglingu en tvíbytnan Alinghi 5 og sigraði með sannfærandi fimmtán mínútna mun. San Fransisco-liðið náði mun betri siglingu alla leiðina bæði á beitilegg og lensi svo þeir eru mun sigurstranglegri. Það getur því allt eins verið að úrslitin ráðist í keppninni á morgun.

Íþróttabandalag Reykjavíkur heiðraði 650 reykvíska Íslandsmeistara í ýmsum greinum síðasta þriðjudag í ráðhúsi Reykjavíkur. Eins og sjá má mættu hinir glæsilegu Íslandsmeistarar Siglingafélags Reykjavíkur í Optimist B, Topper Topaz og kjölbátasiglingum 2009 og tóku við viðurkenningu úr hendi Frímanns Ara Ferdinandssonar, Ásdísar Hjálmsdóttur og Margrétar Þorsteinsdóttur.

Á myndinni má sjá Íslandsmeistara í kjölbátasiglingum, Magnús Arason og Þórarinn Ásgeir Stefánsson (Magnús Waage var fjarri góðu gamni), Íslandsmeistara á Optimist B, Búa Fannar Ívarsson, og Íslandsmeistara í siglingum á Topper Topaz, Hilmar Pál Hannesson og Huldu Lilju Hannesdóttur.

Frá lokamótinu í fyrra

Hið árlega siglingaþing siglingafélaganna verður á laugardaginn í Íþróttamiðstöðinni Laugardal að vanda. Þar munu fulltrúar félaganna takast á um lagabreytingar, stigagjöf, mótaskrána og fleira skemmtilegt sem varðar siglingaíþróttina á Íslandi. Stjórn Brokeyjar mun mæta fyrir hönd félagsins og er hægt að koma athugasemdum á framfæri við stjórnarmenn ef menn vilja láta bera einhver málefni upp á þinginu.

Aðalfundur Siglingafélags Reykjavíkur, Brokeyjar, verður haldinn í félagsheimili félagsins á Ingólfsgarði þann 21.janúar  2010 kl. 20:00.

Dagskrá fundarins er skv. 9.gr. laga félagsins.

Þeir Úlfur og Áki nýttu sér vænan byrinn og birtuna í Nauthólsvík í dag og tóku léttan snúning á Laser og Topaz til að halda bæði sjálfum sér og bátunum í formi. Nú er reglulega "oldboys"-hittingur í Nauthólsvík á hverjum sunnudegi klukkan ellefu þar sem menn taka létt spjall og siglingu ef vel viðrar. Meira af myndum er að finna í myndasafni kænudeildar.